Бүгүн Кыргыз Республикасынын Премьер-министри Ж.Сатыбалдиев Түркия кредитинин алкагында жүргүзүлүп жаткан шаар жолдорун оңдоо иштери менен таанышып чыкты.

 

Азыркы учурда Токомбаев көчөсү боюнча Совет көчөсүнөн Сухе-Батор көчөсүнө чейин инженердик коммуникациялар боюнча иштер жүргүзүлүп жатат. 15-майдан тартып узундугу 1,6 км. жолго асфальт төшөө башталат. Жолдун туурасы 12 метрге чейин кеңейтилди. Жолду куруу иштерин “Грандстар” фирмасы жүргүзүүдө.

 

Аталган жолго үстүбүздөгү жылдын 1-июнуна чейин эки катмарлуу асфальт төшөө жөнүндө шаар башчысы Иса Өмүркулов тапшырма берген. Асфальттын биринчи катмары 7 см., экинчи катмары 5 см. түзөт. Даярдоо иштери аяктап, бордюрлар коюлду.

 

Ж.Сатыбалдиев, жол куруу жана оңдоо иштери жай жүргүзүлүп, шаар тургундары бул жөнүндө кайрылышып жаткандыгын белгиледи жана кытайлык компаниялар күндүр түндүр иштешерин мисал кылды.

 

“10-апрелде Түркия кредитинин биринчи бөлүгү келип түштү, түзүлгөн график боюнча куруучулар иштерди аткарууга жетишип калышат”,- деп белгиледи шаар башчысы И.Өмүркулов.