Баш калаада Бишкек шаарынын 135 жылдыгы кеңири белгиленет

Подробности: Опубликовано 09.09.2013 11:10

Бишкек шаарынын 135 жылдык мааракесин өткөрүү боюнча комплекстүү программага маданий-массалык, спорттук, шаарды көрктөндүрүү жана майрамга карата жасалгалоо иш-чаралары киргизилген.

Ошондой эле майрамга карата базарлардагы соода-сатык иштерин тартипке келтирүү, санитардык тазалоо иштери жүргүзүлмөкчү.

Майрамдык иш-чаралар шаардын Ата-Түрк, Панфилов, Фучик сейил бактарында, Каражыгач багында өткөрүлөт. Кеңири программадагы концерт, спорттук мелдештер, конкурстар уюштурулат. Ал эми жаңы конуштарда массалык майрамдоолор уюштурулат.

Андан тышкары, баш калаада “Мен бийчимин-2013” эл аралык фестивалы, “Боектор фестивалы”, Тамашоу боюнча мэрдин кубогу, “Флористка” гүлдөр фестивалы, аба фигураларынын, балдар чыгармачылыгынын фестивалдары өткөрүлөт.

Шаардын музейлеринде, китепканаларында, музыкалык мектептеринде тематикалык көргөзмөлөрдү, кечелерди өткөрүү белгиленүүдө.